Die gedagte aan ‘n Afrikaanse idiomespel...

Untitled-1

Meer oor Idio

Die gedagte aan ‘n Afrikaanse idiomespel het in Januarie 2010 op die lang pad ontstaan toe Lindie Oppermann en haar man allerlei taaltoertjies met idiome uitgehaal het. Hulle het hulself gevra: geniet ander mense idiome net soveel? Kén mense – en veral jongmense – ooit nog die idiome wat hulle soveel plesier verskaf? Presies ‘n jaar later, na lang ure se swoeg en sweet, ontwerp, beplan en verfyn, is Idio op die mark!

As ‘n gebore en getoë Stellenbosser het die wanderlust Lindie al ver paaie geneem. Nadat sy haar M-graad in Kliniese Sielkunde aan die Universiteit van Stellenbosch voltooi het, het sy vir ‘n paar jaar in die Noord-Kaap gepraktiseer. Daarna het sy en haar gesin vir 3 jaar in Hong Kong gewoon, waar sy Engels gegee het in die plaaslike Chinese skole. Hierdie ervaring het net weer uitgelig dat kinders en volwassenes die beste leer wanneer die inhoud sappig en prettig is – leer is dan ‘n opwindende spel eerder as droë, vervelige teorie. In Engels is daar legio speletjies en leermateriaal beskikbaar; in Afrikaans is dit egter maar dun gesaai, des te meer rede om Idio die lig te laat sien!

Sedert 2013 woon Lindie en haar gesin in Singapoer. Hier het sy die interessante ervaring om Afrikaans te gee vir ‘n paar leerlinge by een van die groot internasionale skole!

Hoe werk hierdie plesierige idiomespel? Op oranje blokkies neem jy ‘n kaartjie uit die “vele hande” boksie en doen ‘n span-aktiwiteit: óf jy moet die idioom vir jou spanmaats mimiek (geluide toegelaat!) óf jy moet dit teken binne ‘n tydsbeperking van 2 minute. Verbeel jou byvoorbeeld jy beduie dat jy nie ‘n gegewe perd in die bek moet kyk nie, of probeer teken hoe agter-os ook in die kraal kom… uit-die-maag-lag is gewaarborg! As die span op ‘n groen blokkie land, word ‘n kaartjie deur die ander span uit die "op eie houtjie" boksie gehaal – hulle lees dan vir jou die vraag op die kaartjie. Jy moet die regte antwoord uit 3 opsies kies of die idioom voltooi. Sit ‘n leerling byvoorbeeld aan die voete van Gamaliёl, Metusaleg of Nebukadneser? En waarin word ‘n stuiwer gegooi as jy iets te sê het oor ‘n onderwerp? Tydens elke aktiwiteit moet spelers ook die betekenis van die idioom probeer reg kry – sodoende bly effektiewe leer nie agterweё nie. Rooi en blou blokkies sorg vir die geluksfaktor – geleenthede vir weer speel en vorentoe skuif gee ‘n lekker hupstoot, terwyl gemiste beurte en ‘n paar blokkies se agteruit-boerdery die span lelik op hul neus kan laat kyk.

Idio is ideaal vir tuisgebruik vir gesinne en groepe vriende. Alle 10-plussers behoort heerlik saam te speel. Idio is ook nommerpas vir gebruik in skole: onderwysers kan ekstra oemf gee aan taalklasse deur die klas in spanne te verdeel. Dan kry elke spanlid ‘n aantal groen en oranje kaartjies om aan sy/haar span te verduidelik. Gee ‘n punt vir elke korrekte idioom en elke korrekte betekenis, tel die punte op, en siedaar, jy het jou wenspan! ‘n Verdere moontlikheid is om elke Afrikaanse les met ‘n kaartjie uit elke boksie te begin – ‘n blitsige opwarmer om selfs die traagste leerders geïnteresseerd te kry! Die kaartjies kan ook deur tuisgebruikers in die kar ingespan word om die lang vakansiepad so ‘n bietjie korter te maak.

Idio word tans vanuit Stellenbosch bedryf deur Marlene Cloete. Sy staan slaggereed om Idio in jou hande te sit en jou gesin, vriendekring of skoolklas aan die speel, lag en leer te kry. Idio – slaan die spyker op die kop!

Só sê die mense...

“Idio het dit reggekry om ‘n afdeling in Afrikaans wat vir die tipiese leerling normaalweg ‘n pyn is om te leer, so lekker te maak dat ‘n mens nie eers besef hoe baie jy leer tussendeur al die lag en pret nie. Idio is definitief vir enigiemand wat uitgehonger is vir ‘fun’!”

Matthys, leerder

“‘n Uitmuntende wyse waarop ons ryk idiomeskat op ‘n prettige manier by ons kinders tuisgebring word. Terselfdertyd sal dit sorg vir ure se vermaak in vriendekringe en gesinne.”

Marlene, Afrikaans onderwyseres

‘n punt vir elke korrekte idioom en elke korrekte betekenis